ગુજરાત:
ગુજરાત પોલીસે ગતરાત્રે ઐતિહાસિક રીતે વિશાળ ઓપરેશન હાથ ધર્યું છે અને રાજ્યમાં ગેરકાયદેસર રીતે વસેલા બાંગ્લાદેશી નાગરિકો સામે મોટી કાર્યવાહી અમલમાં મૂકી છે.
આ ઓપરેશન હેઠળ અમદાવાદમાંથી 890 અને સુરતમાંથી 134 બાંગ્લાદેશી નાગરિકોને પકડવામાં આવ્યા છે.
પોલીસના વરિષ્ઠ અધિકારીઓ અને સમગ્ર ટીમે આખી રાત ખડેપગે રહી કામગીરી કરી હતી.
જણાવાયું છે કે, આ બાંગ્લાદેશી નાગરિકો પશ્ચિમ બંગાળ મારફતે ભારતમાં ઘૂસ્યા હતા અને પછી ફેક ડોક્યુમેન્ટ તૈયાર કરીને અલગ અલગ રાજ્યોમાં વસ્યા હતા.
આમાંથી કેટલાક લોકો ડ્રગ્સ હેરાફેરી અને અન્ય ગુનાહિત પ્રવૃત્તિઓમાં સંડોવાયેલા હોવાનું ખુલ્યું છે.
વિશેષરૂપે, અગાઉ પકડાયેલા ચાર બાંગ્લાદેશી અલકાયદા જેવા આંતરરાષ્ટ્રીય આતંકી સંગઠન સાથે સંકળાયેલા હોવાનું પણ ખુલાસો થયો છે.
રાજ્યના ગૃહરાજ્યમંત્રીએ ઘૂસણખોરો માટે આપ્યું સશક્ત સંદેશ:
“જે બાંગ્લાદેશી ગેરકાયદેસર રીતે ગુજરાતમાં રહે છે તેઓ આગામી બે દિવસમાં નજીકના પોલીસ સ્ટેશન પર હાજર થાય.
જોઈએ તો પોલીસ ઘરે જઈ પકડી લેશે.
જેઓ આવા ઘૂસણખોરોને શરણ આપે છે તેઓને પણ નહીં છોડવામાં આવે.”
આ કાર્યવાહી કેન્દ્ર સરકારના નિર્દેશો અને વડાપ્રધાન નરેન્દ્ર મોદીની બેઠક બાદ લેવાયેલા રાષ્ટ્રીય સુરક્ષા સંબંધિત નિર્ણયો અંતર્ગત હાથ ધરાઈ છે.
ગુજરાત સહિત તમામ રાજ્યોમાં આવી કામગીરીનો સખત અમલ થવો જરૂરી હોવાનું કેન્દ્ર સરકાર દ્વારા જણાવાયું છે.
પોલીસે ફેક ડોક્યુમેન્ટ બનાવનારાઓ સામે પણ કસોટી શરૂ કરી:
જે લોકો બાંગ્લાદેશી નાગરિકોને નકલી આધારકાર્ડ, પાનકાર્ડ કે અન્ય દસ્તાવેજો બનાવી આપતા હતા, તેમની શોધખોળ શરૂ કરવામાં આવી છે અને આવા શખ્સો સામે કડક કાયદેસરની કાર્યવાહી હાથ ધરાશે.
ગુજરાત પોલીસના આ સંકલિત ઓપરેશન માટે એસીપી, ડીસીપી સહિતના તમામ અધિકારીઓ અને પોલીસ જવાનોને રાજ્યના ગૃહમંત્રી દ્વારા અભિનંદન પાઠવવામાં આવ્યા છે.
