જૂનાગઢ
જૂનાગઢ જિલ્લામાં જાહેર સલામતી અને સુરક્ષા જળવાઇ રહે તે માટે જૂનાગઢ અધિક જિલ્લા મેજિસ્ટ્રેટશ્રી એન.એફ.ચૌધરીએ જૂનાગઢ જિલ્લાના સમગ્ર વિસ્તારમાં જુના વાહનોની લે-વેંચ કરનાર તથા આવા વાહનોને ભાડે આપનાર વ્યક્તિઓએ વાહન કોને વેચવામાં આવ્યું છે, કોની પાસેથી ખરીદવામાં આવ્યું છે, કોને ભાડે આપવામાં આવ્યું છે, ખરીદનાર-વેચાનાર-ભાડે આપનાર-ભાડે લેનારનું પૂરું નામ, ઉંમર, સરનામુ, સંપર્ક નંબર, વાહનનો નંબર, પ્રકાર એન્જિન નંબર, ચેસિસ નંબર, રેશનકાર્ડ-ડ્રાઈવિંગ લાયસન્સ, ચૂંટણીકાર્ડ, બેન્ક ખાતાની પાસબુક, પાનકાર્ડ, પાસપોર્ટ, વીજળી બિલ, ટેલિફોન બિલ, ખરીદનારની સહિ, ખરીદનાર પાસેથી મેળવેલી પ્રમાણિત સહિ ધરાવતી ઝેરોક્ષ(નકલ) સહિતના રજૂ કરવામાં આવેલા આધાર-પુરાવાઓની ફાઈલ બનાવી તે રાખવી. વાહન કોને વેચવામાં આવ્યું છે, કોની પાસેથી ખરીદવામાં આવ્યું છે, કોને ભાડે આપવામાં આવ્યું છે આ બાબતે પાસપોર્ટ સાઈઝનો તાજેતરના ફોટોગ્રાફ સહિતનું રજિસ્ટર સ્થાનિક પોલીસ સ્ટેશનમાંથી સહિ-સિક્કા કરાવી તે રજિસ્ટર નિભાવવાનું રહેશે. નોંધણી થયા ન હોય તેવા વાહનોની લે-વેચ કે ભાડે આપતી વખતે દુકાનદારો- એજન્ટો ખરીદનાર ગ્રાહક પાસેથી ઓળખના પૂરતા પુરાવા મેળવવા આવશ્યક છે.
જૂનાગઢ પોલીસ અધિક્ષકશ્રી દ્વારા BNSS-2023 ની કલમ-૧૬૩ હેઠળ જાહેરનામું પ્રસિદ્ધ કરવામાં આવ્યું છે તે જૂના વાહનોના લે-વેચ કરનાર તથા આવા વાહનો ભાડે આપનાર વેપારીઓ-એજન્ટોએ અનુસરવાનું રહે છે.
વાહન લે-વેચ અને ભાડે આપનાર વેપારીઓએ દર મહિનાને અંતે, જૂના ખરીદ-વેચાણ-ભાડે આપવામાં આવ્યા હોય તેવા વાહનોની વિગતો રજૂ કરવાની રહે છે. આ અંગેની વધુ વિગતો જૂનાગઢ જિલ્લા પોલીસ અધિક્ષકશ્રી, જિલ્લા પોલીસ કચેરી, એ.સો.જી.શાખા, ઝાંઝરડા રોડ, જૂનાગઢ – પિન નં.૩૬૨૦૦૧ (ફોન નં.૦૨૮૫- ૨૬૩૫૧૦૧) ખાતે મળી શકશે. વધુમાં માસના અંતે આ સરનામે રજૂ કરવાની વિગતો અચૂક રજૂ કરવી.સમગ્ર જૂનાગઢ જિલ્લામાં તા.૦૪ સપ્ટેમ્બર, ૨૦૨૪ સુધી અમલી રહેશે. ભંગ અથવા ઉલ્લંઘન કરનાર BNSS-2023 ની કલમ-૨૨૩ શિક્ષાને પાત્ર ઠરશે.
અહેવાલ :- નરેન્દ્ર દવે સાથે જગદીશ યાદવ (જૂનાગઢ)
