સુરત :
ડભોલી વિસ્તારમાં આવેલા એક પતરાના શેડમાં લાગી ગયેલી આગની ઘટનાએ આખું મનપા તંત્ર હચમચી ઉઠ્યું છે. અગ્નિકાંડ બાદ હવે મનપાએ ગેરકાયદેસર પતરાના શેડો દૂર કરવાની કામગીરી હાથ ધરી છે, જોકે સવાલ એ ઊઠી રહ્યો છે કે – આ શેડો વર્ષોથી ઊભા હતા ત્યારે મનપાનું તંત્ર શું કરી રહ્યું હતું?
આગ જેવી ગંભીર ઘટના થયા પછી જ તંત્ર કેમ સજાગ બને છે તે મુદ્દે ભાજપના કોર્પોરેટરોએ પણ ખુલ્લેઆમ સવાલો ઉઠાવ્યા છે. તેમનો આક્ષેપ છે કે મનપાની રહેમ નજર હેઠળ જ વર્ષોથી આ પતરાના શેડોમાં કમર્શિયલ પ્રવૃત્તિઓ ધડલ્લે ચાલતી હતી, અને હવે માત્ર દેખાવ માટેના પગલાં લેવામાં આવી રહ્યા છે.
કતારગામ ઝોનમાં આવા પતરાના શેડોનો મોટો રાફડો ફાટી નીકળ્યો છે, જ્યાં આ શેડો બિનકાયદેસર રીતે ઊભા કરવામાં આવ્યા છે અને મનપાના કેટલાક અધિકારીઓની મૌન સહમતિથી તેઓ છેલ્લા ઘણા વર્ષોથી કાર્યરત છે.
મહત્વનું છે કે આજે મનપા તંત્ર દ્વારા કેટલાક પતરાના શેડો દૂર કરવાની કાર્યવાહી હાથ ધરવામાં આવી હતી, પરંતુ કાર્યવાહી માત્ર નામની જણાઈ રહી છે, કેમ કે કાયમ માટેના ઉકેલની માગ સેવાસંસ્થાઓ અને સ્થાનિક રેસીડેન્ટ ફોરમ દ્વારા કરવામાં આવી છે.
મનપાના કેટલાક અધિકારીઓ સ્થળ પર દેખાયા અને નામ પૂરતી કાર્યવાહી બાદ સ્થળ પરથી રવાના પણ થઇ ગયા, જેને લઈ સ્થાનિકોમાં આક્રોશ છે.
સ્થાનિક રહીશોનો સવાલ છે કે જો આ શેડોમાં ભવિષ્યમાં ફરીથી આગ જેવી ઘટના થાય તો તેનો જવાબદારો કોણ રહેશે?
રિપોર્ટર: (સુરત બ્યુરો રિપોર્ટ)
📍 સુરત શહેર – કતારગામ-ડભોલી ઝોન, સ્થાનિક પ્રશાસન સામે પ્રશ્નાર્થ
