*મતદાનનો વિડિયો સોશિયલ મિડીયામાં વાયરલ મામલે તંત્રની કડક કાર્યવાહી*
લોકસભા સામાન્ય ચૂંટણી-૨૦૨૪ અંતર્ગત આજે બનાસકાંઠા જિલ્લામાં મતદાન હતું. જે દરમિયાન મતદાન કરતો એક વિડિયો કોઈ અજાણ્યા ઈસમે સોશિયલ મીડિયામાં વાયરલ કર્યો હતો. જે વિડિયોને ગંભીરતાથી લઈ ચુંટણી પંચની માર્ગદર્શિકા ભંગ કરવા મામલે અજાણ્યા ઈસમ સામે વાવ પોલીસ મથકે ફરિયાદ નોંધાઇ છે.
*મતદાન કરતો વીડિયો ઉતાર્યો હતો*
ભારતના ચુંટણી પંચની માર્ગદર્શિકા મુજબ મતદાન મથકમાં મતદારોને મોબાઈલ લઈ જવા પર પ્રતિબંધ છે. પરંતુ ૭-વાવ વિધાનસભા મતદાર વિભાગના બુથ નં.૧૩૫-જાનાવાડા-૧ પર મતદાન સમયે કોઈ અસામાજિક તત્ત્વ દ્વારા ઇ.વી.એમ. મશીનમાં મતદાન કરતો વિડિયો ઉતારી સોશિયલ મીડિયામાં વાયરલ કરાયો હતો.
*વાવ પોલીસ મથકે ફરિયાદ*
મામલાને ગંભીરતાથી લઈ જિલ્લા ચુંટણી અધિકારી દ્વારા મદદનીશ ચુંટણી અધિકારી સૂઇગામને આ બાબતે કાયદેસરની કાર્યવાહી કરવા માટે સૂચના આપવામાં આવી હતી. જે બાદ વાયરલ વિડિયો મામલે તપાસ કરી ઝોનલ અધિકારીએ લોક પ્રતિનિધિત્વ અધિનિયમ-૧૯૫૧ની કલમ-૧૨૮ અને ભારતીય દંડ સંહિતાની કલમ-૧૭૧F હેઠળ વાવ પોલીસ મથકે ફરિયાદ દાખલ કરી કાયદેસરની કાર્યવાહી કરવામાં આવી હતી.
