સુરત શહેરના સરથાણા વિસ્તારમાં એક હ્રદયદ્રાવક હિટ એન્ડ રનની ઘટના સામે આવી છે. સરથાણા જકાતનાકા નજીક સ્થિત અતિથિ રેસ્ટોરન્ટ સામે બાઈક પર ઉભેલા રત્નકલાકાર યુવકને કાર ચાલકે અડફેટે લેતા ગંભીર ઈજાઓના પગલે તેનું ઘટના સ્થળે જ દુઃખદ અવસાન નિપજ્યું હતું.
મૃતકની ઓળખ રાજેશ ઉકાણી તરીકે થઈ છે, જે સરથાણાના નિર્મળ નગર વિસ્તારનો રહીશ હતો. તે મંડળના પૈસા ભરવા માટે બહાર નીકળ્યા હતા ત્યારે આ દુર્ઘટનાગ્રસ્ત બનાવ બન્યો હતો.
હિટ એન્ડ રનની સમગ્ર ઘટના નજીકના સીસીટીવી કેમેરામાં કેદ થઈ હતી. જેના આધારે સરથાણા પોલીસે ઝડપથી તપાસ હાથ ધરી હતી. કારચાલક સામે ગુનો નોંધી તેની શોધખોળ શરૂ કરવામાં આવી હતી.
પોલીસે હવે આરોપીની અટકાયત કરી લીધી છે તથા બનાવ સ્થળે રિ-કન્સ્ટ્રક્શન (પ્રતિકૃતિ બનાવવાની પ્રક્રિયા) પણ કરવામાં આવી છે જેથી ઘટનાની તમામ પરિસ્થિતિઓને સ્પષ્ટ રીતે સમજી શકાય.
રાજેશ ઉકાણીના નિધનથી પરિવારજનો અને રત્નકલાકાર સમાજમાં શોકની લાગણી વ્યાપી છે.
📍 અહેવાલ: બ્યુરો રિપોર્ટ
