🗳️ ગીર સોમનાથ જિલ્લાના ૬૩ ગ્રામ પંચાયતોમાં શાંતિપૂર્ણ માહોલમાં યોજાયું મતદાન

 ગીર સોમનાથ જિલ્લા પંચાયત ચૂંટણી 2025 અંતર્ગત આજે ૬૩ ગ્રામ પંચાયતોમાં મતદાન શાંતિપૂર્ણ માહોલમાં સંપન્ન થયું હતું. સવારે ૭:૦૦ વાગ્યે શરૂ થયેલી મતદાન પ્રક્રિયામાં વાદળછાયા વાતાવરણ વચ્ચે મતદારોનો ઉમટતો ઉત્સાહ જોવા મળ્યો હતો.

જીલ્લાના છ તાલુકાઓમાં સામાન્ય, વિભાજન, મધ્યસત્ર અને પેટા ચૂંટણીઓ માટે કુલ ૧,૩૨,૨૪૮ મતદારો મતાધિકારનો ઉપયોગ કરશે, જેમાં ૬૭,૦૧૯ પુરુષ, ૬૫,૨૨૮ સ્ત્રી અને અન્ય ૧ મતદારનો સમાવેશ થાય છે.

જિલ્લાના વિવિધ તાલુકાઓ મુજબ ગ્રામ પંચાયતોનું વિભાજન નીચે મુજબ છે:

• વેરાવળ – ૮ ગ્રામ પંચાયત

• કોડીનાર – ૨૪ ગ્રામ પંચાયત

• સૂત્રાપાડા – ૬ ગ્રામ પંચાયત

• તાલાલા – ૧૦ ગ્રામ પંચાયત

• ઉના – ૬ ગ્રામ પંચાયત

• ગીર ગઢડા – ૯ ગ્રામ પંચાયત

આ તમામ વિસ્તારોમાં કુલ ૧૬૭ મતદાન મથકો પર મતદારો પોતાનો મત આપવા માટે પધાર્યા છે.

મહત્વપૂર્ણ વાત એ છે કે સમગ્ર ચૂંટણી પ્રક્રિયા શાંતિપૂર્ણ રીતે પાર પાડી શકાય એ માટે જિલ્લા ચૂંટણી તંત્ર દ્વારા સુનિયોજિત વ્યવસ્થા કરવામાં આવી છે. કાયદો અને વ્યવસ્થાની દ્રષ્ટિએ એ.એસ.પી., ડી.વાય.એસ.પી. કક્ષાના અધિકારીઓ તથા પોલીસ જવાનો દ્વારા તદ્દન ચુસ્ત સુરક્ષા બંદોબસ્ત ગોઠવવામાં આવ્યો છે.

મોટા પાયે મતદારોની હાજરી અને શિસ્તબદ્ધ વ્યવસ્થા સાથે ગ્રામ પંચાયત ચૂંટણી ૨૦૨૫ લોકશાહીના પર્વ તરીકે ઉજવાઈ રહી છે.

📝 અહેવાલ: પ્રકાશ કારાણી, વેરાવળ – સોમનાથ