🗳️ ડભોઇ તાલુકામાં ગ્રામ પંચાયત ચૂંટણીનો શાંતિમય પ્રારંભ, મતદાતાઓમાં ભારે ઉત્સાહ

ડભોઇ તાલુકામાં આજ રોજ યોજાયેલી ગ્રામ પંચાયતની સામાન્ય અને પેટા ચૂંટણી માટે મતદાન પ્રક્રિયાનો શાંતિપૂર્ણ પ્રારંભ થયો છે. સવારથી જ મતદાતાઓ ઉત્સાહપૂર્વક મતદાન મથકોએ પહોંચી રહ્યા છે અને લોકશાહી પર્વને ઉજવી રહ્યા છે.

તાલુકાની કુલ ૨૩ ગ્રામ પંચાયતોની સામાન્ય અને ૨ ગ્રામ પંચાયતોની પેટા ચૂંટણી માટે આજે મતદાન હાથ ધરાયું છે. બેલેટ પેપર પદ્ધતિથી ચાલી રહેલી આ મતદાન પ્રક્રિયામાં સવારથી જ મતદાતાઓની લાંબી કતારો મતદાન મથકો પર જોવા મળી રહી છે.

વિશેષ વાત એ છે કે દિવ્યાંગ તથા વૃદ્ધ મતદાતાઓ પણ ઉત્સાહભેર પોતાના મતનો ઉપયોગ કરી રહ્યા છે. મતદાતાઓના આગમનને ધ્યાનમાં રાખી તંત્ર દ્વારા યોગ્ય વ્યવસ્થા કરવામાં આવી છે.

ડભોઇ તાલુકાની ૫ ગ્રામ પંચાયતો પહેલેથી જ સમરસ જાહેર થઇ ચૂકી છે, જ્યારે બાકીની ગ્રામ પંચાયતોમાં મતદાન ચાલી રહ્યું છે.

સ્થાનિક સ્વરાજ્યની ચૂંટણી હોવાને કારણે ઘણાં મતવિસ્તારોમાં તંગપાસીનો માહોલ સર્જાયો છે. અત્યાર સુધીમાં અંદાજે ૧૨% મતદાન નોંધાયું છે અને દિવસભર આ આંકડો વધુ વધે તેવી શક્યતા છે.

ચૂંટણીને સુચારૂ રીતે પાર પાડી શકાય એ માટે તંત્ર સજ્જ બન્યું છે અને સમગ્ર જિલ્લામાં શાંતિ અને કાયદો વ્યવસ્થા જળવાઈ રહે એ માટે સુરક્ષા વ્યવસ્થાઓ ગોઠવાઈ છે.

📝 અહેવાલ: વિવેક જોષી, ડભોઇ