🚧 LC-18 રેલવે ફાટક બંધ કરવાની રેલવે તંત્રની યોજના સામે 20 જેટલા ગામોનો ઉગ્ર વિરોધ

ડભોઇ, તા. ૩૦:
ડભોઇ તાલુકાના કુઢેલા ગામ પાસે આવેલી રેલવે ફાટક નંબર LC-18 ને કાયમી ધોરણે બંધ કરવાની રેલવે તંત્રની હિલચાલ સામે કુઢેલા સહિત આસપાસના 20 જેટલા ગામોના રહીશોએ ઉગ્ર વિરોધ નોંધાવ્યો છે. રેલવે તંત્ર દ્વારા અહીં નવી લુપ લાઇન બનાવવાની કામગીરી હાથ ધરાતા મુખ્ય રસ્તો બંધ કરવાનો વિચાર કરવામાં આવ્યો છે.

આ ફેરફારના પરિણામે અવરજવર માટે ગ્રામજનોને LC-17 ફાટક તરફ ડાયવર્ટ કરવામાં આવશે, જે રસ્તો એટલો સાંકડો અને નીચાણવાળો છે કે વરસાદમાં અહીં ભારે પાણી ભરાઈ જાય છે. ખાસ કરીને નવા બનેલા કુંઢેલા કેન્દ્રીય યુનિવર્સિટીમાં અભ્યાસ કરતા 3000થી વધુ વિદ્યાર્થીઓ અને અન્ય ગ્રામજનો માટે આ નિર્ણય મુશ્કેલીભર્યો બની શકે છે.

વાઘોડિયા, કરજણ અને પોર જોડતો આ મુખ્ય રસ્તો ભારે વાહન વ્યવહારથી ભરેલો રહે છે. રાહદારીઓની સુરક્ષા અને સુવિધા મુદ્દે ઉઠેલા પ્રશ્નો પર હવે રેલવે તંત્ર દોડતું થયું છે. રેલવેના એક્ઝિક્યુટિવ એન્જિનિયરો અને સ્થાનિક ધારાસભ્ય શૈલેષ મેહતાએ ઘટના સ્થળે પહોંચી ગ્રામજનોની રજૂઆતો સાંભળી અને ફાટક ખુલ્લું રાખવાની હૈયાધારણા આપી છે ત્યાં સુધી યોગ્ય ઉકેલ ન મળે.

અહેવાલ: વિવેક જોષી, ડભોઇ